Vinkel en lemoen varkvleis frikadelle met spaghetti

Ek het varkvleis op die brein die laaste ruk. Eintlik sedert twee weke gelede toe ek die voorreg gehad het om vir middagete aan te sit in die Hamm & Uys restaurant op die pragtige Blaauwklippen landgoed. Die geleentheid? SA Pork se jaareindfunksie vir mense in die kosbedryf. En wat ’n viering van die wonder van varkvleis was dit nie, met ’n vyfgang maal ontwerp om die veelsydigheid van varkvleis te toonskou.

Eerste aan die beurt was ’n slaai met mosbolletjies en kaiingbotter, toe verleidelike plompe mossels in ’n roomsous gegeur met coppa ham. Volgende, gebraaide Koreaanse varkvleis ‘rashers’ met waterblommetjie kimchi. Steeds was ons nie klaar geëet nie want dis gevolg deur varknek-denningvleis op stampmielie risotto met vinkel en appel. En vir poeding? Spek-en-eier roomys! Wat kan ek sê? Aandete was nie nodig nie!

Dis die ding van varkvleis – daar’s regtig omtrent niks wat mens nie daarmee kan doen nie. Ek het al menige varkvleis resep gedeel want ek is dol daaroor. Van my varktjops met sampioene en sider-roomsous tot vark-en-groenvy terrien, van geroosterde vark lendeskyf tot parmesaan en roosmaryn varkvleis schnitzels. Maar na die feesmaal van SA Pork was ek skoon begeesterd om iets nuuts met varkvleis te probeer. Hier is hy: Vinkel en lemoen varkvleis frikadelle in ’n verleidelik romerige tamatie-pastasous. As jy resep inspirasie soek hierdie feestyd, dink varkvleis!