Marokkaanse lam met framboos-ment sous

Drentel ’n pop in ’n skoen- of klerewinkel rond vir ’n paar uur sonder om iets te koop gee niemand ’n duit om nie. Probeer dieselfde ding in ’n supermark en die sekuriteitsknape kyk jou skeef en skuif sommer vinnig nader. Blykbaar is supermark-drentel nie gewens nie. Ek’s min gepla. Ek vat my tyd en ek snuffel, ruik en lees etikette. Dis die beste manier om nuwe resep idees te kry.

Soos die ander dag, toe ek op een van my snuffel ekspedisies ’n bottel Marokkaanse Ras El Hanout spesery in Woolies gewaar. Dis ’n geurige mengsel van koljander, komyn, naeltjies, gemmer en ’n spul ander wonderlike goed. In Marokko is g’n twee dieselfde nie want elke self-respekterende mamma meng haar eie. Dit klink te veel na moeite, so die bottel beland in my mandjie. Terug by die huis marineer ek vet lam ‘steaks’ in olyfolie en ’n stewige skoot Ras el Hanout. Ek gooi hulle op die braai tot hulle net-net medium is, sny hulle in dik skywe en tuimel hulle op ’n groot bord met ’n framboos-en-ment sousie ding. Tog te fraai. Toe ek die resep weer vir die afnemery maak kon ek ongelukkig net lamtjops kry – nie so mooi nie, maar net so lekker.