As kind het ek (seker maar soos duisende ander kleingoed) beet met ’n passie gehaat. Dit het my lank gevat om te besef dis nie beet se skuld nie, dis hoe ons beet mishandel – gerasper en gebottel in asyn. Ek’s nou mooi groot en sit steeds nie my mond aan dáái bottels winkelbeet nie.
Beet self voorberei is nie ’n ding om voor bang te wees nie. Gooi die knape, net so ongeskil, in ’n pot water en kook hulle tot sag. Dis sommer baie vinnig. Maar as jy nou regtig die intense aardsheid van beet behoorlik wil omarm, is dit beste om hulle in die oond te rooster.
Ek het inspirasie geput uit Oos-Europa vir hierdie geroosterde beetslaai. Dáár word suurroom dikwels saam met beet gebruik. Dis ’n lieflike kombinasie maar ’n nagmerrie vir die middellyf en die cholesterol. Dik gewone joghurt gee jou daai romerige pikante smaak, maar dis soveel gesonder! Dille is nog ’n wenkombinasie saam met beet, so gebruik sommer tonne.
Al wat jy nodig het is…
4 medium bete
1E olyfolie
¼ koppie verouderde balsamiese asyn (die Forage & Feast een by Checkers is goeie kwaliteit en billik op die beursie)
½ koppie okkerneute
1 koppie (250ml) dubbelroom gewone joghurt
skil van een lemoen, so fyn moontlik gerasper (’n ‘microplane’ is briljant hiervoor)
seesout en growwe swartpeper
groot handvol dille, rofweg gekap
Was die bete goed, bedruip met die olyfolie en draai hulle snoesig toe in foelie. Rooster in ’n 180 grade Celsius oond tot sag – dit vat so ’n uur. Laat beet effe afkoel, skil en sny in groot stukke. Gooi die balsamiese asyn oor die beet en laat dit marineer vir ten minste ’n uur.
Sit die okkerneute op ’n bakplaat en rooster hulle vir so 10 minute in ’n 180 grade oond. Kap die okkerneute dan rofweg. Meng die joghurt met die lemoenskil en skep dit op ’n groot bord. Dreineer die beet en skep dit op die joghurt. Gee die lot ’n paar draaie seesout en sommer baie swartpeper. Strooi die dille en okkerneute oor dis tyd vir opskep.
Hierdie geroosterde beetslaai sal vier bedien as bykos. As jy dit net so op sy eis vir ’n ligte middagete wil geniet sal dit twee mense voer.
bedien
2-4
vooraf
20 min
rooster
60-80min
Los 'n Boodskap