Dolle dag vis gebak

Doller as kopaf – ons het almal daai dae. Partykeer is dit nie net ’n dag nie, maar sommer ’n hele week. Dís hoe dinge laasweek by Melkkos & Merlot was. Met nege outjies bewapen met hammers en ‘angle grinders’ op die dak kon dit nie eintlik anders nie. Dak vervang is nie vir sissies nie. Merlot’s ’n slim kat. Sy’t die spul een kyk gegee en vir vyf dae oor die pad na die bure verdwyn. Ek’t dit ook oorweeg, veral hier teen dag drie.

Almal wat al ooit ‘gerenovate’ het weet, kóók midde in al die chaos is nie pret nie. Maar eet moet mens. Toe die spulletjie uiteindelik begin bedaar en die knape oppak vir die dag maak ek ’n bottel wyn oop en loop snuffel in die vrieskas. Ek voer ’n oondvaste bak met gerookte skelvis (haddock), sommer nog so gevries. ’n Paar kannie-flop goeters bo-oor en ek gooi die spul in die oond. Dertig minute later lê ek weg aan knoffelrige, romerige, kaserige vis-verleiding en sien sommer weer kans.