Kitke Franse roosterbrood met heuning-geroosterde pruime

Kyk Maandag tot Vrydag is brêkvis in die M&M kombuis maar ’n skrapse affêre. Die fokus is op gesonde energie vir die dag en vínnig afsluk. Maar dan’s daar naweke mens, en dinge kan nie meer anders wees nie. Ek sit my selfoon af en kyk nie vir die klok nie. Soms bodder ek nie eers met grimering nie. Want wie gee dan nou om? Ek hoef mos nie vir myself te kyk nie. Waarmee ek wél bodder is eet – genotvol en langsaam. Stoute soete botterige verleiding is net die ding om ’n Saterdag reg te begin. Franse roosterbrood is natuurlik nie noodwendig ongesond nie. Maar hy is soos ék hom naweke maak.

Met sy sagte tekstuur en sweempie soet is Kitke-brood een van my gustelinge. Ek sny hom dik en doop hom in ’n romerige, soet melk-en-eier skommel gegeur met vanielje en hope spesery. En dan braai ek die knaap in botter. Dis heerlik net so met ’n sweempie heuning. Maar as jy nou regtig wil uithang, rooster sommer ook plompe pruime wat nou so wonderlik in seisoen is met bietjie heuning. ’n Lepel of twee mascarpone of dik joghurt en die Kaap is sommer weer Hollands.