Okkerneut-pizza met gerookte bees en brie

Gooi die neute in ’n droë pan en rooster hulle net tot jy hulle begin ruik. Verwyder en kap hulle fyn.

Gooi die droë bestanddele in ’n groot mengbak (moenie die sout op die gis gooi nie). Meng die heuning met die water en melk en voeg dit en die olyfolie by die droë bestanddele. Meng goed saam – ek vind hande doen dit die beste. Tuimel deeg uit op ’n werksoppervlak wat lig met meel bestrooi is , gooi die neute oor en vou hulle in en knie dan die deeg vir tien minute. Sit deeg in ’n diep skoon bak wat liggies met olyfolie geverf is, maak die bak goed toe met kleefplastiek en sit dit eenkant om te rys vir ’n uur.

Voorverhit intussen jou oond tot 240 grade Celsius met twee bakplate reeds in die oond. Maak ook solank die vinaigrette deur die olies en asyn saam te klits met ’n knippie sout en peper.

As die deeg klaar gerys is, slaan dit plat, vorm die deeg in ’n dikkerige wors en verdeel in vier. Vorm vier deegbolletjies en druk hulle liggies plat met die hand. Rol hulle dan verder uit met ’n koekroller. Hoe dunner jy hulle maak, hoe brosser is hulle. Ek verkies hulle so 1cm dik. Verf die bakplate met bietjie olyfolie en gooi die pizzas op. Verf hulle ook met olie en gee hulle ’n blerts seesout en swartpeper. Bak hulle tot goudbruin en deurgaar– sowat 10 minute. Verwyder en pak met dik skywe brie, skep ’n paar dotjies rooibosbessie-jellie op en sit dit terug in die oond tot dit net-net begin smelt. Brie is ’n sensitiewe knaap, dit vat net ’n paar sekondes so hou dit met valkoë dop.

Sodra die kaas begin smelt, verwyder die pizzas en sit die gerookte bees op. Volgende aan die beurt is die mikro-blare natgemaak met die okkerneut-olie vinaigrette. ’n Laaste paar neute en hy’s reg. Bedien dadelik terwyl warm.