Anthonij Rupert Wyne – Franschhoek

Maar ek het ander planne gehad, so na die proe is ek vort op die plaasbus, spesiaal gebou om soos ’n egte San Francisco trêm lyk. Ons vat die plaas se agterpaaie en ek sit terug en begeer bewonder. Om ’n paar draaie, verby ’n dam en spogperde, op met nog ’n laning en uiteindelik is ons by ons bestemming – die Franschhoek Motormuseum wat op die L’Ormarins gedeelte van die plaas is. Hier huisves vier reuse fênsie ‘skure’ die beste motorversameling op die vasteland, waarskynlik een van die bestes in die wêreld. Van die eerste Model A Ford wat in 1914 na Suid-Afrika ingevoer is, tot blinkrooi Ferraris (ja-nee, die begeerte) – jy sal sommer vinnig besef jy hoef nie kar befoeterd te wees om hierdie museum te waardeer nie. En – iets wat my hart sommer warm maak – elke liewe bordjie is in Afrikaans, so ook die motormuseum se webwerf. Oulike Afrikaanse mense, dié Ruperts.

Al die begeerte maak ’n pop nogal honger, so terug op die plaastrêm mik ek vir die hipermoderne Terra del Cappo proelokaal en antipasto restaurant. Hier kan jy hulle Italiaans geïnspireerde Terra del Cappo wyne proe (Pinot Grigio, Sangiovese en meer) asook hulle sakpas elke-dag Protea reeks wyne. As jy eers besluit het wat jou geval, bestel ’n glas of ’n bottel en lê weg aan hulle antipasto – wit ansjovis, bros kalamari, sappige lamtjoppies en veel meer… Dis heerlik, die porsies groot vir antipasto en die pryse baie goed in vergelyking met soortgelyke antipasto/tapas spyskaarte op ander wynplase.

Teug, knabbel en sit gemaklik terug terwyl jy deur die restaurant se glasmuur loer na waar Terra del Cappo se bottels volgemaak word. As die honger nie meer knaag nie, maak ’n draai by die landgoed se winkel langs die restaurant. Laai jou mandjie vol heuning en olyfolie van die plaas, mooi glase, wonderlike kombuisgoeters en natuurlik WYN.

Met dank aan die toegewyde span by Anthonij Rupert Wyne vir die uitnodiging en ‘n wonderlike dag.